近 日香港最熱門話題，莫過於新界東補選應該投楊岳橋定梁天琦。支持楊岳橋嘅，理據同過往差唔多，但撐梁天琦嘅，就會強調「按自己意願投票」、「新希望」等， 林日曦亦如是說：「由始至終只得一個投票標準，就是不把票投給過去一屆未能帶來改變的舊人舊政黨，寧願把票投給新人新政黨，買一個希望。」
未知之數，從來都係一個最完美嘅概念。買咗隻細價股，你總會憧憬佢會獲莊家垂青爆上，甚至賣殼。同一個新男人一齊，你總會憧憬佢比上一個更好，即使呢一刻你欠缺審判佢嘅充足材料。世上無嘢比你嘅想像更美好，因為你嘅想像係為你度身訂造。
梁天琦嘅政綱對唔少香港人而言非常討好，「行政首長及立法會全面直選，貫徹香港自治」、「反對外部政治干預，維護香港自主體制」。我唔會質疑梁天琦當選後違反承諾，但我懷疑有幾多可以 實行到。一個男人追你時，總會許下十萬個天大嘅承諾，或者嗰一刻係出於真心，但一齊之後，先發覺要全部實行亦唔容易。
有人話，最初幾場戀愛必然失敗 收場，因為你以感覺行先，揀一個自己最鍾意嘅人。但人長大後，情場翻了幾個筋斗以後，先明白一切不如人願，最鍾意同最適合原來係兩回事。若然一開始就將最 適合嘅人交到你手上，你唔會珍惜，更加唔會心息，至少希望愛到自己筋疲力盡為止，每個人如是，即使到時已經為時已晚。
不過，後悔同遺憾從來係智慧嘅養份。如果梁天琦入到立法會，令泛民主派形勢更加分化，又或者佢最後令周浩鼎當選，從而令香港選民上了一課，亦不失為香港民主進程嘅小陣痛。但願呢場陣痛唔會有永久負作用。
賈文清
附註：梁天琦、楊岳橋、周浩鼎均為新界東立法會補選候選人，其他候選人包括劉志成、黃成智、梁思豪、方國珊。
●體驗全新「明報財經網」
●Like「明報財經 mpfinance」fb專頁！
相關字詞﹕編輯推介