農曆新年將至，一向創意無限嘅美國駐香港及澳門總領事館，今日喺facebook發放一條賀歲短片，祝大家新年快樂。為迎接猴年，新片以中國名著《西遊記》為背景，總領事夏千福飾演唐僧，搵齊3個徒弟之後，就同佢地齊齊向香港市民拜年，而且全程講流利廣東話，氹得網民好開心啊。
觀音大使吩咐「千福BB」完成使命，仲畀左塊鏡佢，話可以照到徒弟嘅真面目。於是夏千福就出發去澳門，搵到豬八戒，仲一齊食當地名產葡撻；然後就返咗去香港嘅車公廟，搵埋沙僧同孫悟空（由毛公仔飾演）兩個徒弟，完成去總領事館祝所有人萬事如意嘅任務。
不過，原來一切都係場夢，一覺春秋大夢醒來嘅夏千福，隨即同領事館仝人祝大家「猴年快樂、萬事如意、恭喜發財！」
唔少網民都喺fb留言，大讚千福BB發音好，多謝佢哋尊重香港文化同語言，有人仲話連中國政府都唔會同香港人講廣東話。
掌握最新消息，請Like「明報即時新聞」fb專頁！http://www.facebook.com/mingpaoinews
相關字詞﹕迎新春 Emily Online 夏千福 美國駐香港及澳門總領事館 編輯推介