即時港聞

【Emily Online】財會OT抗拉布 CY送餅慰勞 建制議員驚訝:淨係請食餅? (17:02)

喺泛民「拉布」之下,港珠澳大橋工程追加撥款逼近死線,財會今日加開8小時會議審議。建制派議員星期六都要開OT,特首梁振英好貼心,特別喺小休期間,委託助理送上4盒東海堂蛋糕同2盒牛乳蛋撻慰勞。

喺立法會坐足大半日嘅議員都食得好滋味,不過好多人都唔知原來係CY心意,連「拉布」議員黃毓民都差啲食咗。正當黃毓民走入休息廳,拎起一件蛋撻,先畀記者告知茶點來自特首。佢立即好似燙手山芋咁擺低蛋撻,又向食緊嘢嘅建制派大呼「哇,你陰我!好彩無中計」。

亦有建制議員得知CY送來糕點感到驚訝,又半笑半埋怨話「淨係請食餅?唔係應該請吃飯呀?」似乎佢哋對成日要幫政府政策護航有啲微言噃。

繼政務司長林鄭月娥送叉燒為建制派打氣之後,Emily今日所見,特首糕點款色多多,包括芒果慕斯、木糠蛋糕、朱古力蛋糕等。

掌握最新消息,請Like「明報即時新聞」fb專頁! http://www.facebook.com/mingpaoinews

【好趕時間】會議一開始,主席陳健波即設「兩小時提問環節」...報道:http://bit.ly/1WT7gdj【陳健波一句「唔好畀啲壞人干擾」激怒泛民 最終收回】http://bit.ly/1ntZSbR【收輸入外勞申請 張建宗稱...

Posted by 明報即時新聞 on Friday, January 29, 2016

相關字詞﹕編輯推介 拉布 港珠澳橋 編輯推介

上 / 下一篇新聞