港視主席王維基行出嚟有份霸氣,估唔到佢原來幾有童心,最近換咗個動畫電影角色「阿愁」嘅手機殼。佢同Emily講:「望住佢,自己唔使咁愁。」聽講王維基嘅辦公室仲有隻「阿燥」擺設,全因佢覺得電影《玩轉腦朋友》好好睇喎。
王維基平時係咪好愁又好燥,Emily就不得而知,但港視員工每到年尾應該都會變「阿樂」,事關老闆講到明,就算公司盤數唔靚,都會照樣加薪兼派花紅,好似上個月就平均派咗1個月花紅。港視員工每年4月會加薪,暫時未知嚟緊加幾多,不過王維基就「拍心口」會加得多過4%,超過通脹。
最近好多網台湧現,佢話自己最近太忙,未得閒睇,但閒時都有上iTunes Store買電影同電視劇睇。好似香港Netflix都未有得睇嘅《House of Cards》(紙牌屋),佢一早就下載咗去iPad。佢話唔敢講Netflix喺香港能唔能夠成功,但暫時睇嚟,Netflix嘅美劇選擇未夠多。
另外,Netflix、樂視都無本地製作,佢話見唔到對香港創意工業有大幫助。佢再三強調自己無放棄過進軍電視業,港視位於將軍澳嘅多媒體中心今年內起好,之後就會重新拍節目,仲話製作費唔會縮水。
無綫行政總裁李寶安日前不點名批評新電視台「燒煙花」,王維基就話,有心孕育創意工業要肯投資、肯博,「有牌照就唔係燒煙花」。港視家同通訊辦傾緊流動電視嘅播放制式,佢話進度慢,但有信心今年搞得掂。
掌握最新消息,請Like「明報即時新聞」fb專頁! http://www.facebook.com/mingpaoinews