噚晚播出嘅港台節目《我係乜乜乜》,請嚟身兼青年事務委員會主席嘅華置前主席劉鑾雄大兒子劉鳴煒,和曾出演電影《哪一天我們會飛》的新晉演員游學修,出選「男神選舉」。見唔到樣嗰陣,游學修大勝,劉鳴煒得2票,但布幕拉開,多名參與投票的港女馬上轉軚,劉鳴煒最後反勝,連劉鳴煒都話港女「現實」。
兩大男神今日都在facebook發表「賽後感」,慣用英文的出爐男神劉鳴煒,罕有以中文發貼說「選舉非常緊張刺激!節目進行到一半仲以為輸梗,但結果真係出奇過出奇蛋!我只可以話,女士們的眼睛是雪亮的(且極度現實的)。」
劉鳴煒說,一開始答應錄影是因為呢集嘅話題「好有趣好值得討論」,佢話「男神/女神」、「港男/港女」等字眼近年盛行,有可能出於大家既偏見或慾望。佢又反問,如果金錢和物質就係兩個人感情嘅基礎,呢段關係又會有幾堅固呢?最後仲學四點鐘許sir,recap in English,果然兼顧到中外佳麗喎。
而落敗的游學修在facebook貼出他和一眾支持他的港女的自拍照。佢話港台要搵個未紅不黑嘅藝人先有得估下,唔想大家叫佢「男神」。喺佢心目中嘅男神,一定要高富帥有才華有智慧,梁朝偉、劉德華嗰啲,仲自嘲話「上呢個節目只係為咗搏上下鏡咋唔係咩」。
游學修又形容劉鳴煒太「離地」,「佢係個大方得體禮貌嘅上流人,只係...太上流,掂唔到地」。游仲話,除咗錢之外,相信有人真心覺得劉鳴煒靚仔過佢先轉軚,「但唔緊要,我另一半唔係好理呢啲」。Emily明架啦,蘇小姐唔介意就得啦。
掌握最新消息,請Like「明報即時新聞」fb專頁! http://www.facebook.com/mingpaoinews