年~又過年，過埋個聖誕節後，我地就要同2015講拜拜了，我相信各位大人都會掛住去玩，唔再睇實個魚缸了，但係佢地話過完年會再戰呀，仲話有個咩「一月效應」，究竟係咩東東呢，等 BB 話你知啦~~~
關於「一月效應」呢，主要有兩個說法，一個就係每年一月，股市都會係升多過跌；另一個呢，就係以一月股市嘅走勢，預測全年表現，即係話如果一月升，股市全年都會升，反之亦然。
究竟點解一月通常會升呢？其實呢個說法嘅發源地係來自美國，最早由美國銀行家 Sidney B. Wachtel 於1942年發現，所以「一月效應」本身係以美股為測量基礎嘅。根據分析，通常美國散戶都會係年尾出貨，以盡量減低資產增值稅嘅繳稅水平，然後再於一月再戰股壇，另外，亦有指基於企業通常於一月出年終花紅，所以有助刺激資金投入股票市場，帶旺股價！
正所謂「大膽假設，小心求證」，好啦，既然知道左咩叫「一月效應」，等 BB 睇下呢個效應啱唔啱啦！睇返2005年至今11年嘅恒指數據，總共有6個一月係升嘅，5個一月係跌嘅；如果撇除今年，2005至2014年，總共有五年嘅全年走勢係同一月相同嘅。咪住，咁咪即係「一月效應」唔係百分百準確！？
無錯喇！其實宜家已經開始有唔同人認為「一月效應」已開始失效，更加唔係定律添，因為隨著環球資訊流通、資金流動加快，每個股市之間環環相扣，而每個經濟體當中影響股市嘅基本因素有別，例如內地往往於每年二、三月兩會舉行前後，有重大政策出台，刺激相關股份上升等，所以資金對消息嘅敏感度加大，導致股市嘅升跌唔再有特定嘅規律。
等我舉例說明啦，過去10年內，2008年係跌得最勁嘅一月，主要因為當年美國次按風暴失控導致環球股災，導致恒指由當年1月9日嘅高位約27600點，以不足兩週嘅時間急跌至22000點樓下，個一年全年恒指共跌左13425點或48%；而2009年，雖然一月急跌7.71%，但其後由於資金湧進，刺激港股從低位反彈，令恒指全年急速飆升52%。由此可見，其實資本市場的波動主要受基本因素影響，並無既定嘅規律。
其實除左「一月效應」外，不同地方對於整體股市嘅走勢嘅都有不同的說法，例如港股有「五窮、六絕、七翻身」、美股亦都有「Sell in May and go away」(於五月沽貨離場)的說法，但亦不是百分百準確，所以 BB 認為，投資股票最重要係做足功課，留意消息靈活部署，量力而為！
掌握最新消息，請Like「明報財經 mpfinance」fb專頁！
相關字詞﹕編輯推介