一部 iPhone 價錢點解總係遠遠跑贏其他牌子？相信好多 iPhone 用戶嘅答案不外乎「生活態度」、「好用」，又或者「品牌好」；再進一步，可以話「字體獨特」、「外形優雅」，又或者「功能體貼」。用形容詞去形容一件產品，有人情味之餘亦有睇法，但始終流於主觀。蘋果公司相機硬件資深總監Graham Townsend日前就用數字話畀大家聽 iPhone 有幾好：一個鏡頭，由超過800人研發。
Graham Townsend早前接受《六十分鐘時事雜誌》訪問，同主持人Charlie Rose對答時表示，一個iPhone鏡頭大概有200個獨立零件，而負責研究iPhone 鏡頭嘅班底，就有800幾個工程師同專責其他範圍嘅專家。如果要比較班底規模嘅話，中國天然氣(0931)年報顯示，截至6月底，員工總數夾埋都只有55名，咁即係蘋果一個鏡頭，就已經超越14間中國天然氣，千祈唔好話唔專業！
不過，蘋果公司亦似乎唔係無懈可擊，Apple Watch推出市面大約8個月，至今仍然未公布具體銷量。蘋果行政總裁Tim Cook俾主持人問到覺得Apple Watch需唔需要改進時，就大耍太極，話「所有產品都要持續改進，Apple Watch亦非例外，我哋會對Apple Watch持續作微調」。
掌握最新消息，請Like「明報財經 mpfinance」fb專頁！