【Emily Online】PPRB 新任總警司「展大俠」　難忘搗最大鹹網　300萬現金塞爆夾萬 (19:20)

刑偵出身的區sir 十分健談，emily及行家都好有興趣知區sir 的查案經歷，被同袍暱稱「展大俠」嘅區sir 提到，近年深刻案件包括搗破全港最大鹹網 141.com 的過程，原來當時曾經出動飛虎隊，仲要搵埋警方的專門「夾萬專家」去爆開集團的金庫，搜走咗成300萬現金。

展大俠講到，當時飛虎游繩入網站總部，喺寫字樓起出證物及贜款，拉左過百人，搜到現金多到幾近塞爆佢寫字樓夾萬。

另一單深刻案件，展大俠提到係去年《明報》劉進圖被斬案，佢諗起案發翌日便提早抽調到O記上班主理案件，當時查到天昏地暗，見班伙記查通宵，佢不時跟到深宵3、4點，索性喺寫字樓瞓幾粒鐘，瞓醒又繼續做，將兩兇手繩之於法，至於幕後主腦的調查，展大俠話案件一直查緊。

展大俠名副其實係CID man ，又進修讀左港大犯罪學碩士課程，講開才知他同「無味神探」陳思褀係同期出學堂，兩人相識，早前係無味神的探喪禮上致悼辭。

嚟到PPRB，展大俠話要多做功夫改善現時緊張的警民關係，先集中係社交媒體方面，繼四點鐘許sir後，警隊facebook 又引入新卡通角色：警員恒仔、同埋係警署餐廳工作會沖奶茶嘅阿港。當然，emily 同行家都講起，除左fb，本位上增強警隊透明度及社會的互動，也是核心所在。

兩位總警司仲著咗警察圍裙，其中一個袋印有傳統警民關係途徑，少年警訊及耆樂警訊圖案，另一個袋就印有網絡途徑，即警隊youtube 、facebook 圖案。講到警民關係，兩位阿sir就示範飲啖茶傾下偈之重要。