壹傳媒創辦人黎智英的被掟豬雜案今日喺東區法院提堂，一班「反黑金關注組」示威者原定喺法院外向黎抗議，點知「捕獲」嘅係同一時間現身法院、為兩條公職人員行為失當罪應訊嘅前特首曾蔭權，一班示威者見有人影被大批記者包圍，就誤以為佢係黎智英，衝上前大罵曾蔭權係「走狗」。
其實，示威者擺烏龍事件屢見不鮮，除咗「點錯相」，仲試過「舉錯牌」、「寫錯字」等等......
1.李國寶誤當李柱銘
嚿年4月個時，民主黨創黨主席李柱銘同美國時任副總統拜登會面後返港，20多個自稱「網民自發」嘅叔叔嬸嬸就喺機場等住示威，見到大批記者追訪「李生」後，就即刻上前「無恥！漢奸！賣國賊！」點知原來個位「李生」係咁啱出埠返嚟嘅東亞銀行主席李國寶。
2.「馬斐森」變「馬婓深」
今年8月時，團體「珍惜群組」同「和平論壇」約40個成員去港大示威，抗議學生喺衝入校委會會議，要求「嚴重失職」嘅港大校長馬斐森問責下台，不過呢班示威者嘅橫額就被發現勁多錯字，例如「馬斐森」寫成「馬婓深」；然後「禁錮校委會」寫成「禁固」、「腳踢」校委個「腳」字，又寫咗做簡體字「脚」。
3.「撤查」佔中三子
除咗認錯人，寫錯字令意思相反嘅事都令人啼笑皆非，嚿年9月時，一班中年示威者帶住橫額去中文大學抗議，橫額上寫着「強烈要求廉署撤查佔中三子」，但將「徹查」寫咗做「撤查」，變成要求撤回調查。
4.是可忍「熟」不可忍
嚿年12月時，兩個團體舉行「撐警」遊行，但橫額錯將「是可忍孰不可忍」寫成「是可忍『熟』不可忍」，記者提醒有錯字時，示威者仲反問「唔係生熟個熟咩？」但之後仍繼續撐住寫有「是可忍熟不可忍支持警察嚴厲執法」橫額示威。
掌握最新消息，請Like「明報即時新聞」fb專頁！ http://www.facebook.com/mingpaoinews
【忍唔住笑】曾蔭權抵達法庭時，被大批記者包圍，令一眾示威者以為他是黎智英，不停大叫「黎智英走狗」報道：http://bit.ly/1ZfjSgc【曾蔭權案】第三度提訊 轉介高院審理http://bit.ly/1MkystA#明報...Posted by 明報即時新聞 on Thursday, December 17, 2015