標準工時立法凍過水，噚日同樣由標準工時委員會委員組成嘅勞工顧問委員會，就《施政報告》向政府表達標準工時及強積金對冲議題嘅關注，但政務司長林鄭月娥就臨時「甩底」唔見人，得番勞福局長張建宗同民政事務局長劉江華主持會議。Emily聽講，張建宗同劉江華全程都係得個聽字，冇任何承諾或意見回應勞工界訴求。政務司長辦公室回應，由於要出席另一場會議，故未出席施政報告諮詢會。
除咗標時，勞工假期及公眾假期劃一至17日嘅討論一樣停滯不前，勞顧會噚日開會傾劃一假期，資方代表就話要再返去諮詢商會意見，但今次已經係今年勞顧會最後一次會議，意味要拖到下年先再開會。
其實資方喺今年4月會議上已經話要諮詢商會會員，隔咗成7個月再傾，估唔到資方又話要番去再問會員意見。Emily收到風，勞工界原本覺得劃一假期阻力較細，以為好快講掂數，但資方噚日寸步不讓，又感到本身係勞顧會主席嘅勞工處長唐智強開會「無料到」，冇做中間人緩和氣氛，政府又冇提出一個具體方案如分階段劃一假期畀大家商議，拉近勞資雙方距離，結果次次都你有你講、我有我講，傾唔埋欄。 掌握最新消息，請Like「明報即時新聞」fb專頁！ http://www.facebook.com/mingpaoinews
【有片睇：詭異的氛圍】路過真係會嚇親.....詳情：http://bit.ly/1Ti1T4U【多圖】藝術家游走北京「吸」霧霾100天 製磚諷污染http://bit.ly/1QPBC00【短片】許志安內地唱《怎麼捨得你》 崔健狠...
Posted by 明報即時新聞 on 2015年12月1日