區議會選舉戰況激烈，噚日喺西半山般咸道被斬嘅石牆樹位置，就有人貼上不滿戰果嘅英文標語，標語內容質問選民點解仲選無盡力護樹、親建制嘅陳捷貴出任中西區（大學）區議員，「I don't bloody understand why you still voted Stephen Chan（我真係唔明點解你仲要選陳捷貴）」。
到咗今日，關注西環嘅facebook專頁「西環變幻時」再貼出圖片，話有一男子晏晝喺同一個地方用噴漆塗改標語頭幾個字，變成咗「I understand why you still voted Stephen Chan（我明點解你仲要選陳捷貴）」，同之前不滿陳當選嘅選民有來有往。
早前有人喺被斬嘅石牆樹位置，貼出「唔明點解你仲要選陳捷貴」嘅標語，借棵樹間接追究陳捷貴被指無盡力保護古老嘅石牆樹，表達不滿佢當選。但今日下午喺facebook專頁貼出嘅照片所見，有一名男子喺樹前塗改標語，除咗將「I don't bloody understand」改做「I understand」之外，仲喺前面加咗「請尊重市民的投票」幾個字。
網民見呢名男子嘅舉動都紛紛留言，有人就唔明「乜有話唔尊重咩？唔明白就係唔尊重？」又有網民反而比較關心佢喺樹前噴漆，唔知「樹根」有無事。
到傍晚時分，再有人影到樹上嘅標語後幾個字被人拆咗，剩返「請尊重市民的投票 I understand」，睇嚟大家都發揮無限創意去表達自己對投票嘅意見。
陳捷貴嘅競爭對手係29歲嘅劉偉德，係傘兵一族，最終劉以300幾票之差，輸咗畀做咗多屆中西區議員嘅陳捷貴。
陳捷貴噚日回應《明報》查詢時就話標語用字粗鄙﹕「畀意見我毋須用粗口，咁係唔應該。」佢話啲選民都替佢不值，「民主選舉要尊重結果，係我贏咗就要接受結果」
掌握最新消息，請Like「明報即時新聞」fb專頁！ http://www.facebook.com/mingpaoinews
【人證？】吳謦燃指，希望泛民中人明白，受建制指使參與「鎅票」，等同出賣戰友，是極其可恥之舉，比明刀明槍加入建制更可恥。http://bit.ly/1OrrsiJ【區選戰後】惋惜鍾樹根落選？ 劉江華：不宜評論個別人士及黨派...Posted by 明報即時新聞 on Wednesday, November 25, 2015