唔少香港人平日出外食飯都會叫返杯嘢飲,但點樣提防「高糖陷阱」?消委會最新發表嘅《選擇》月刊就搜集咗市面食肆101款常見非預先包裝中式冷熱飲品化驗,發現三成都係高糖飲品,就等小編介紹吓點樣分辨呢啲高糖飲品:
點為之「高糖」?
宜家嘅飲品糖含量水平並無法定限量,不過喺現行《食物及藥物(成分組合及標籤)規例》下,每100毫升飲品若含唔超過5克糖,就可以叫做「低糖」飲品;而每100毫升飲品若唔超過0.5克糖就叫「無糖」。而衛生署《學生小食營養指引》,每100毫升飲品嘅糖含量若超過7.5克,就係「高糖」飲品。
邊啲係高糖飲品?
消委會化驗結果發現,西洋菜蜜、酸梅湯、山楂飲品同柑桔/柚子蜜嘅含糖量較高,以下為消委會列舉嘅部分「高糖」飲品:
西洋菜蜜:
1.灣仔七喜粥麵小廚(230毫升),每100毫升含糖量13克
2.尖沙嘴澳門茶餐廳(230毫升),每100毫升含糖量10克
3.油塘銀龍茶餐廳(230毫升),每100毫升含糖量9.8克
酸梅湯:
1.旺角百利火鍋海鮮酒家,每100毫升含糖量16克
2.深水埗鍋居火鍋專門店(660毫升),每100毫升含糖量13克
3.天后滾得棧(320毫升),每100毫升含糖量9.7克
山楂飲品:
1.尖沙嘴泰豊廔酒家-凍山楂茶(1000毫升),每100毫升含糖量19克
2.佐敦麵麵店-凍山楂冰(320毫升),每100毫升含糖量10克
3.馬鞍山阿桂老友粉-凍山楂蘋果茶(500毫升),每100毫升含糖量8.4克
柑桔/柚子蜜:
1.屯門榮式燒雞扒-熱柚子蜜(230毫升),每100毫升含糖量16克
2.灣仔喜喜燒臘粉麵茶餐廳-熱柚子蜜(210毫升),每100毫升含糖量13克
3.筲箕灣華星冰室-熱柚子蜜(220毫升),每100毫升含糖量11克
4.尖沙嘴翠華餐廳-熱金裝桔仔蜜(190毫升),每100毫升含糖量10克
其他飲品:
1.沙田雲桂香米線專門店-凍菊花茶(320毫升),每100毫升含糖量8.7克
2.荃灣嘉樂冰廳-熱杏仁霜(280毫升),每100毫升含糖量13克
3.荃灣小王牛肉麵-洛神花雪梨茶(210毫升),每100毫升含糖量9.6克
4.東涌聯邦皇宮-凍竹蔗水(1600毫升),每100毫升含糖量9.2克
5.佐敦金撈老鴨湯刺身火鍋專門店-凍檸檬薏米水(300毫升),每100毫升含糖量8.6克
咁仲飲咩好?
消委會調查發現,其實羅漢果茶同豆漿嘅含糖量就比較低。消委會仲建議,點餐時可以要求食肆提供「少糖」或「無添加糖」飲品,或者把糖或糖水分開上;消費者亦可以留意吓飲品分量,如果分量太多,可以考慮分幾次飲或同其他人分享。
想知更多詳情,可以留意吓今期《選擇》月刊。
掌握最新消息,請Like「明報即時新聞」fb專頁!http://www.facebook.com/mingpaoinews
【勿貪甜頭】在非預先包裝中式飲品中,山楂飲品及柑桔/柚子蜜含糖量並列最高,而預先包裝飲品,則以酸梅湯平均含糖量最高。(陳淑安攝)報道:http://bit.ly/1MgWCZt【各款Wi-Fi蛋日費相差1倍 最高網速相差24倍】...Posted by 明報即時新聞 on Sunday, November 15, 2015