「馬港之戰」今日開賽，香港足球隊面對馬爾代夫政治局勢緊急，仍去咗當地作賽，喺今日當地時間下晝3點50分（香港時間晚上6點50分）開賽，等小編同大家介紹吓呢場賽事有乜睇？
賽事焦點？
今場係世界盃亞洲區外圍賽C組賽事，港隊經過5場世盃外圍賽後，以10分排喺同組全勝嘅卡塔爾之後、位列次席，並且以3分領先少打1場嘅中國隊，但由於國足同日迎戰不丹，全取3分十拿九穩，所以港隊若想保持領先3分優勢，喺下周二旺角場迎擊國足嘅話，今仗對馬爾代夫就不容有失。
馬爾代夫喺6月小組嘅首輪賽事，同一球場面對榜首卡塔爾，堅持至補時98分鐘先告失守，僅以0：1 飲恨，睇嚟主場威力亦不容忽視。提提你，一場波贏咗有3分，和有1分，輸就無分，今次真係「一定要贏」啦。
邊度有得睇？
1.電視台
有線電視61台／201台今晚獨家6點50分直播賽事，有收費台又想約埋朋友喺屋企睇波嘅球迷可以留意一吓。
2.YouTube
亞洲足協一如以往會喺YouTube直播「馬港之戰」，無裝有線嘅球迷都可用手機或電腦撐港隊。
連結：http://youtu.be/BJl2n5xFiE4；或喺YouTube搜尋「Maldives vs Hong KongAFC」
3.戶外打氣
港隊打氣團體「香港力量」會喺理工大學VA嘅戶外公共空間一齊睇波兼打氣，而中文大學聯合書院學生會，亦會喺張祝珊師生康樂大樓外空地戶外直播。
馬港大戰風波？
今次賽事可謂一波三折，自從馬爾代夫官方喺今個月4號宣布進入緊急狀態令30日，香港足總一度向國際足協（FIFA）要求更改比賽場地，但FIFA仍維持原定安排喺馬國比賽。
之後港足總再向馬國足總建議比賽由當地晚上時間9點、改至傍晚6點舉行，但對方就以黃昏要禱告為由拒絕，反改早至下午3點50分，港足總想改返晚上9時不果，即係如今要港隊冒高溫作賽。
當地嘅緊急狀態令已經喺港隊抵埗當日撤銷，馬國軍警亦承諾會確保安全，而香港方面則仍維持對當地嘅黃色旅警。
掌握最新消息，請Like「明報即時新聞」fb專頁！ http://www.facebook.com/mingpaoinews
力爭3分保次席，We are Hong Kong！【決戰馬爾代夫】港隊誓全取3分 教練金判坤：沒任何事能阻球員爭勝決心 （關注體育 讚好 明報體育MingpaoSports！）報道：http://bit.ly/1HHSNZ2【香...Posted by 明報體育MingpaoSports on Wednesday, November 11, 2015