多年以來，好多追求穩健回報嘅讀者都投資內銀收息，6厘或7厘年息，股價若再升少少，真係穩陣又不用煩，回報亦不失禮。現時內銀股價一跌再跌，有投行倡導大家入場掃貨，真係時候瞓身內銀？同芬佬私下交流，睇法就有所不同。
呢一年，各類中國相關訪問，大家最中意講嘅就係「舊經濟」同「新經濟」。簡單來講，資源、銀行、傳統製造業都係舊經濟；騰訊、阿里巴巴、小米手機就係新經濟。再簡單來講，宜家上證指數PE最平嘅都係舊經濟，深圳創業板就有好多新經濟。
如 果一定要睇PE、買平野，舊經濟、譬如內銀已經夠晒平，反而創業板再跌一半都不奇怪。不過，奇怪之處係不少芬佬反而中意深圳多過上海大藍籌。尋日，我同一 位私交不錯的基金董事食飯，他就好老實咁話，以前炒舊經濟都賺不少，不過，呢一兩年已經全部退出來，呢排就一支獨注買樂視（300104.SZ）。呢位芬 佬朋友現時喺內地Run地產基金，內銀係最大客戶。
好啦，講返內銀啦，四次減息之下，息差收窄，利息難賺，非利息收入又 由邊度來呢？我呢位老友咪係貢獻非利息收入咯。他去銀行募集資金做地產（工行係大客來嘅），呢排做基礎設施，年回報只有6至7厘，銀行打包成理財產品賣俾客戶，5厘左右，咁樣，銀行通常 只係收1厘度佣金。啊？咁低？低過凈息差一大截喔！四大行話時運不濟，息差閒閒地都要收2厘幾啦。仲有喔，前排都有期貨fund同我講，他們做配資，優先資金 保本9厘，就算跌市平倉都照收9厘，老友，你咁低，邊到有銀行會同你做啊？
不過，老友就好平淡咁回應咗我兩條問題。第一，配資已經被圍獵封殺，同埋，真係連續跌停幾日，理你優先、劣后，9厘息一樣收唔返。風險不同，定價不同；第二，呢排間間大行出來講，自己股市投資佔比係幾咁少，但他見到情形卻不同，「真係咁少影響，鬼需要救市咩？」
顧冷冰