區議會選舉臨近，唔少政黨都加緊宣傳「成功爭取」嘅政績。有網民今朝早行過西環水街，竟然見到有一排「人板」企喺街邊「熱烈歡迎」，紙版上寫住「梗有一刻喺左近」，仲有民建聯標誌。
原來係民建聯中西區支部社區幹事楊學明嘅宣傳奇招，現場總共擺咗19個近似真人比例、每個5呎5吋高嘅紙版公仔，旨在話俾人知民建聯幾咁關注爆喉對街坊嘅影響。
Emily喺近12點幾去咗水街現場觀察，，發現宣傳板霸佔左六分之一條路，全長30至40米，十分壯觀，但因為紙板公仔容易撞跌，行經街坊都要份外小心。Emily喺現場等咗15分鐘，都唔見有任何民建聯職員喺現場睇住宣傳品，後來見到有人喺每個紙板人面上貼住寫有「請勿違規掛宣傳品」紙張。
原來貼紙嘅係民主黨西貢辦事處職員陳先生，佢本身係西區居民，話見到紙板人霸路覺得好唔妥，佢話宣傳板放喺現場約2個鐘都無人睇住，不滿有人經常用告示板阻街，佢以前都不時向食環署投訴，但情況一直無改善，所以貼紙話俾對方知係違規擺宣傳品。
後來可能有街坊懷疑宣傳品阻街而報警，終於有警察到場了解，而身為紙板人「男主角」嘅楊學明亦親身出現，同另一位職員一齊收起宣傳板。楊學明佢話當時去咗廁所，平時都會有職員睇住宣傳品，而陳先生就上前話：「去廁所去咗兩個鐘？啲嘢一齊冇人睇住！」
楊學明承認擺紙板前無通知食環署，但就話唔會阻街，佢仲乘機向Emily宣傳政績，解釋每個告示板都係佢過往跟進爆水喉工作情況，擺街站係想帶出爆喉對街坊的影響，「希望大家印象深刻啲」。
至於係咪有意出戰區議會選舉，楊學明就話正在考慮當中。Emily翻查資料，發現楊學明喺上屆區議會曾經出戰水街選區，但輸咗俾民主黨黃堅成。
相關字詞﹕編輯推介 Emily Online